लालीगुरांश (सिर्जना भण्डारी)
तिम्रो एक झलककोलागि तड्पीरहने मन
तिम्रो यादको नशामा दिनरात लठ्ठीरहन्छ ।
तिम्रो सामिप्यता पाउन लालायित हृदय
तिम्रो प्रेमको मादकतामा पलपल झुमिरहन्छ ।
तिम्रो अधरको मधुरस पिरहने नयन
तिम्रो साथको दृश्यमा हलपल डुलिरहन्छ ।
तिम्रो वाणीको माधुर्यतामा झुमिरहने कान
तिम्रो मृदुभाषको संगीतमा हरक्षण नाचिरहन्छ ।
तिम्रो स्पर्शको सुगन्ध लिरहने नाक
तिम्रो मुस्कानको अमृत क्षणक्षण पिरहन्छ ।
तिम्रो प्रेमको शितलतामा भिजिरहने आत्मा
तिम्रो प्रीतिको गहिराइमा पलपल डुबिरहन्छ ।
तिम्रो आलिंगनको मिठास खोजिरहने तन
तिम्रो आगमनको पर्खाइमा संधै टोल्हाइरहन्छ ।
तिम्रो आँखामाआँखा जुधाउने अतृप्त तृष्णा
तिम्रो नजरको हेराइसंगै प्यास मेटाइरहन्छ ।
तिम्रो काँधमाकाँध मिलाउने कर्मको चाहाना
तिम्रो आमन्त्रणको भावसंगै हरक्षण फक्रिरहन्छ ।
तिम्रो काँधमाकाँध मिलाउने कर्मको चाहाना
तिम्रो आमन्त्रणको भावसंगै हरक्षण फक्रिरहन्छ ।।
No comments:
Post a Comment