नयाँ जीवन जन्मिरहेछ💗💖

                                              लालीगुरांश  (सिर्जना भण्डारी) 

जीवनमा तिमी मलाई यसरी खोज्छौ

यस्तो लाग्छ, परमात्मा स्वयंले खोजिरहेछ।
हृदयको धड्कन यसरी तेज हुन्छ
यस्तो लाग्छ, नयाँ जीवन जन्मिरहेछ।
तिम्रो अधरमा यति चमक पाउँछु
यस्तो लाग्छ, दिव्य ज्योति चम्किरहेछ।
तिम्रो नयनमा यस्तो संकेत देख्छु
यस्तो लाग्छ, असिम चाहत बढिरहेछ।
तिम्रो आभासमा यस्तो ताप पाउँछु
यस्तो लाग्छ, मैनसरी तनमन पग्लिरहेछ।
तिम्रो हेराइमा यस्तो चमत्कार पाउँछु
यस्तो लाग्छ, जीवन सुन्दर बनिरहेछ।
तिम्रो वाणीमा यति माधुर्यता पाउँछु
यस्तो लाग्छ, सुमधूर ध्वनि गुञ्जिरहेछ।
तिम्रो मुस्कानमा यति ताजकी पाउँछु
यस्तो लाग्छ, जीवन कञ्चन भैरहेछ।
तिम्रो मौनतामा यति गुञ्जन पाउँछु
यस्तो लाग्छ, प्रितको राग बजिरहेछ।
तिम्रो तृष्णामा यस्तो मादकता पाउँछु
यस्तो लाग्छ, यौवन रंगीन भैरहेछ।
तिम्रो हाँसोमा यति आनन्द पाउँछु
यस्तो लाग्छ, सारा प्रकृति हाँसिरहेछ।
तिम्रो गीतमा यस्तो झंकार पाउँछु
यस्तो लाग्छ, हावामा सरगम बजिरहेछ।
तिम्रो गुनगुनाइमा यति मिठास पाउँछु
यस्तो लाग्छ, कोइलीले भाका हालिरहेछ।
तिम्रो उपस्थितिमा यस्तो सुवास पाउँछु
यस्तो लाग्छ, वरिपरीको मौसम मगमगाइरहेछ।
तिम्रो कवितामा यति सरलता पाउँछु
यस्तो लाग्छ, जीवन सहज बनिरहेछ।
तिम्रो पर्खाइमा यति धैर्यता पाउँछु
यस्तो लाग्छ, हाम्रो गोरेटो जोडिइरहेछ।
तिम्रो लक्ष्यमा यस्तो दृढता पाउँछु
यस्तो लाग्छ, दुई हृदय निकट भैरहेछ।
तिम्रो रित्याइमा यस्तो गहिराइ भेट्छु
यस्तो लाग्छ, डुवेर परम-पार लागिरहेछु।
तिम्रो रोजाइमा यति पूर्णता पाउँछु
यस्तो लाग्छ, जीवनमा परिपक्वता आइरहेछ।
तिम्रो कर्ममा यति समर्पण पाउँछु
यस्तो लाग्छ, मानवीयताले काँचुली फेरीरहेछ।
तिम्रो दौडाइमा यति उद्धभव पाउँछु
यस्तो लाग्छ, विकासले गति लिरहेछ।