ति नजरमा नजर मिलाई प्रेमरस म पिइरहेछु

                               लालीगुरांश  (सिर्जना भण्डारी) 

अहो! भुतुक्कै पार्ने तिम्रा ति नजरका हेराइ

ति नजरमा नजर मिलाई प्रेमरस म पिइरहेछु ।

 

परम-ज्योतिको आभा छ तिम्रा ति नजरमा

त्यहि परम ज्योतिको अलौकिकतामा म तैरीरहेछु ।

 

नशाले भरिएका छन् तिम्रा ति प्रेमपूर्ण हेराइ

त्यहि नशामा डुबेर सारा जगत म भुलिरहेछु ।

 

अति प्यारो नजरले जव हेर्छौ तिमी मलाई

तिमीलाई नियालौं कि तिम्रा हेराइलाई म अल्मल्लीरहेछु ।

 

यि नजरमा नजर मिलाई जव मुस्कुराउँछौ तिमी

त्यहि मुस्कानमा परम-आनन्दको मिठास म पाइरहेछु ।

 

ति नजरले मेरा भावहरु जव नियाल्छौ तिमी

मिठा-मिठा प्रेमका भावहरु लुकाउँदै म लजाइरहेछु ।