प्यारो दिनमा प्यारो प्रियतमलाई प्यारो अनुरोध

              लालीगुरांश  (सिर्जना भण्डारी) 

आफ्नोलागि उत्कृष्ट शव्द चयन गर्नु

तिमीनै मेरो परमपुज्य परमात्मा हौ
आफ्नोलागि उत्कृष्ट उपमा चयन गर्नु
तिमीनै मेरो हृदयको प्रियतम हौ
आफ्नोलागि स्वच्छ वातावरण चयन गर्नु
तिम्रो हरश्वासमा म चलिरहेको हुन्छु
आफ्नोलागि उत्कृष्ट भाव चयन गर्नु
तिम्रो हरभावनामा म तरंगीरहेको हुन्छु
आफ्नोलागि यादगार स्मृति चयन गर्नु
तिम्रो हरढुकढुकीमा म धड्कीरहेको हुन्छु
आफ्नोलागि उज्वल मुहार चयन गर्नु
तिमीमै मेरो चमक झल्किरहेको हुन्छ
आफ्नोलागि सुन्दर पहिरन चयन गर्नु
तिमीमै मेरो सौन्दर्यता छल्किरहेको हुन्छ
आफ्नोलागि स्वादिष्ठ भोजन चयन गर्नु
तिमीबाटनै म स्वाद लिरहेको हुन्छु
आफ्नोलागि मनोरम दृश्य चयन गर्नु
तिम्रो हरखुशीमा म मुस्कुराइरहेको  हुन्छु
आफ्नोलागि सहज आसन चयन गर्नु
तिम्रो हरबसाइमा म साथसाथ हुन्छु
आफ्नोलागि रमणीय प्रकृति चयन गर्नु
तिम्रो हरआनन्दमा म आल्हादित हुन्छु
आफ्नोलागि सहज सवारी चयन गर्नु
तिम्रो हरयात्रामा म हिडिरहेको हुन्छ
आफ्नोलागि साहसिक कार्य चयन गर्नु
तिम्रो हरजोशमा म हौसिरहेको हुन्छु
आफ्नोलागि सहज जीवन चयन गर्नु
तिम्रो हरसफलतामा म झुमिरहेको हुन्छु

आफ्नोलागि सरल दैनिकी चयन गर्नु
तिम्रो हरसुखमा म रमाइरहेको हुन्छु

आफ्नोलागि शान्त वातावरण चयन गर्नु
तिम्रो हरधारणामा म छाइरहेको हुन्छु
आफ्नोलागि मिठो संगीत चयन गर्नु
रागको हरआलापमा म गुञ्जीरहेको हुन्छु
आफ्नोलागि सुमधूर गायन चयन गर्नु
शव्दको हरतरंगमा म थरथराइरहेको हुन्छु
आफ्नोलागि भक्तिमय किर्तन चयन गर्नु
भक्तिरसको हरतालमा म नाचिरहेको हुन्छु
अरुकालागि उत्कृष्ट स्ववचन चयन गर्नु
तिम्रो हरवाणीमा म बोलिरहेको हुन्छु
मेरोलागि शव्दहरु उनेर कवितामाला बुन्नु
तिम्रा हरशव्दमा म उनिइरहेको हुन्छु
आफ्नोलागि मिठो सुगन्ध चयन गर्नु
तिम्रो हरउपस्थितिमा म मगमगाइरहेको हुन्छु
आफ्नोलागि रोमाञ्चक एकान्त चयन गर्नु
तिम्रो हरश्रृंगारलाई म सजिइरहेको हुन्छु
आफ्नोलागि सुविधायुक्त सयनकक्ष चयन गर्नु
तिम्रो हरसपनामा म आइरहेको हुन्छु
आफ्नोलागि आरामदायि विस्तरा चयन गर्नु
तिम्रो अंगालोमा म निदाइरहेको हुन्छु ।

आफ्नोलागि आरामदायि विस्तरा चयन गर्नु
तिम्रो अंगालोमा म निदाइरहेको हुन्छु ।