लालीगुरांश (सिर्जना भण्डारी)
छुपाएर तिमीलाई आफूमा आफैंभित्र तिमीलाई भेटाउनु छ
मेटाएर आफूलाई तिमीमा जीवन पूर्णतामा पुर्याउनु छ
कल्पिएका रंगीन सपनाले जीवन नयाँ बनाउनु छ
पहिरिएर पिरतीको माला हृदयमै स्वर्ग बसाउनु छ ।
हारेर तिमीलाई मानव सर्वकल्याणलाई जिताउनु छ
लुकाएर हृदयको आहट वाहिर मुस्कुराहट छर्नु छ
हारेर जितेको बाजी हारमै आफूलाई जिताउनु छ
बिर्सेर सबै पिडा मनलाई आनन्दमा भुलाउनु छ ।
सिलाएर फाटेको मन वाहिर सिंगो देखाउनु छ
मिलाएर छरिएका तृष्णा मन भित्रै समेट्नु छ
खाएर पिरतीको कसम अटुट प्रेममा बाँधिनु छ
जुटाएर मनको साहस नयाँ संसार बसाउनु छ ।
पिएर नजरको प्याला आत्मा तृप्त बनाउनु छ
मेटाएर मनको प्यास आपसि साथ निभाउनु छ
जोखेर कर्तव्यको भार आपसमा आधा-आधा बाँड्नु छ
बाँडेर अधिकारको अंश म र तिमीमा भर्नु छ ।
हिंडेर उकाली ओराली जीवनलाई अगाडि बढाउनु छ
सहेर सबै कठिनाइहरु जीवनको अनुभव संगाल्नु छ
सारेर पिरतीको विरुवा जीवनमा हरियाली सजाउनु छ
बारेर पिरतीको खेती जीवनलाई सुरक्षित बनाउनु छ ।
छुपाएर तिमीलाई आफूमा आफैंभित्र तिमीलाई भेटाउनु छ
मेटाएर आफूलाई तिमीमा जीवन पूर्णतामा पुर्याउनु छ
कल्पिएका रंगीन सपनाले जीवन नयाँ बनाउनु छ
पहिरिएर पिरतीको माला हृदयमै स्वर्ग बसाउनु छ ।
पहिरिएर पिरतीको माला हृदयमै स्वर्ग बसाउनु छ ।।
No comments:
Post a Comment