प्रेम

                                   लालीगुरांश  (सिर्जना भण्डारी) 

प्रेम यति मिठो किन, तिमीलाई भुलाउनै नसकिने

प्रेम यति मुस्कील किन, दुनियांलाई बुझाउनै नसकिने

प्रेम यति झूठो किन, दशीप्रमाण जुटाउनै नसकिने

प्रेम यति सत्य किन, हृदयबाट मेटाउनै नसकिने!

 

दुनियांले प्रेमको गन्तब्यमा पुग्न देओस या नदेओस

तिमीबाट खुशी र आनन्द पाइरहुँ, त्यतिनै काफी छ

दुनियांले पवित्र प्रेमको गहिराई बुझोस या नबुझोस

तिम्रो हृदयमा म सदा धड्कीरहुँ, त्यतिनै काफी छ

दुनियांले पवित्र प्रेमको निश्छलता जानोस या नजानोस

तिम्रा आँखामा प्रेम सदा छचल्किरहोस, त्यतिनै काफी छ

दुनियांले मेरो खैर खवर सोधोस या नसोधोस

तिम्रो हेरचाहमा म सदा रहीरहुँ, त्यतिनै काफी छ

दुनियांले पवित्र प्रेमलाई सम्मान देओस या नदेओस

तिम्रो झुकाउ र कदर रहीरहोस, त्यतिनै काफी छ

दुनियांले मलाई संधै खुशी देओस या नदेओस

तिम्रो मिठो यादमा म डुबीरहुँ, त्यतिनै काफी छ

 

प्रेम यति मिठो किन, तिमीलाई भुलाउनै नसकिने

प्रेम यति मुस्कील किन, दुनियांलाई बुझाउनै नसकिने

प्रेम यति झूठो किन, दशीप्रमाण जुटाउनै नसकिने

प्रेम यति सत्य किन, हृदयबाट मेटाउनै नसकिने!

 

तिमी प्रेमको वर्षा वर्षाईराख

             लालीगुरांश  (सिर्जना भण्डारी)

तिमी अटुट प्रेमको वर्षा वर्षाईराख

म तिम्रो यादमा निथ्रुक्क भिजीरहुँ

तिमी ओठमा मिठो मुस्कान छरीराख

म तिम्रो खुशीमा आनन्दित भइरहुँ

तिमी दिव्य अलौकिक भाव पठाईराख

म तिम्रो इश्वरीय भावमा डुबीरहुँ

तिमी कल्पनामा मलाई सजाइराख

म तिम्रो हृदयको रानी बनीरहुँ

तिमी सुन्दर नयनले मलाई चियाइराख

म तिम्रो दृश्यमा सदा छाईरहुँ

तिमी सपानका चंगा उडाईराख

म तिम्रो लट्टाइको धागो बनीरहुँ

तिमी हृदयमा मेरो याद धड्काईराख

म तिम्रो यादहरुमा झुम्दै नाचीरहुँ

तिमी अजम्बरी पिरतीको वासुरी बजाईराख

म तिम्रो धूनको मादकतामा लठ्ठीरहुँ

तिमी इसाराले मलाई संकेत दिईराख

म तिम्रो आव्हानमा दौडीदौडी आईरहुँ

तिमी पानीको ऐनामा दोछायां बनाईराख

म तिम्रो छायांसंग छायां मिलाईरहुँ

तिमी नमेटीने यादका विमान उडाईराख

म तिम्रो सवारीको यात्री बनीरहु

तिमी भमरा बनी फूलमा डुलीराख

म तिम्रो प्रेमको प्यास मेटाईरहुँ

तिमी परम आनन्दको सुवास छरिराख

म तिम्रो आँगनको तुलसी बनीरहुँ

तिमी दिव्य शान्तिको दियो बालीराख

म तिम्रो शितलतामा सुस्तरी जलीरहुँ

 

तिमी दिव्य शान्तिको दियो बालीराख

म तिम्रो शितलतामा सुस्तरी जलीरहुँ

आहा आहा भो

                              लालीगुरांश  (सिर्जना भण्डारी) 

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।

तिम्रो मन मेरो मन साझा जस्तो लाग्छ

तिमी बिना दिव्य यात्रा अधूरो झैं लाग्छ

साथी मात्र~ ~ ~ ~ ~   

साथी मात्र होइन, यहाँ दिव्य साथ भेटीयो

त्यसैले त तन र मनको भाव जोडियो, अनि…

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।

तिम्रो खुशी तिम्रो शान्ति आफ्नै जस्तो लाग्छ

तिम्रो याद हृदयमा अमृत सरी छाउंछ

प्रेमी मात्र~ ~ ~ ~ ~   

प्रेमी मात्र होइन, यहाँ आफैं भेटीयो

त्यसैले त तन र मनको भाव जोडियो, अनि…

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।

तिम्रो आगमनले जीवन बैकुण्ठ झैं लाग्छ

तिमी साथ हुँदा मनमा शितलता छाउंछ

प्रीति मात्र~ ~ ~ ~ ~   

प्रीति मात्र होइन, यहाँ दिव्य थीति भेटीयो

त्यसैले त तन र मनको भाव जोडियो, अनि…

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।

तिमीसंग उड्दा आकाश आफैं जस्तो लाग्छ

दिव्य प्रकाश अंगअंगमा बले जस्तो लाग्छ

प्रेम मात्र~ ~ ~ ~ ~   

प्रेम मात्र होइन, यहाँ परमात्मा भेटीयो

त्यसैले त तन र मनको भाव जोडियो, अनि…

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।

आहा आहा भो, हृदय आहा आहा भो

कस्तो हुन्छ दिव्य साथ बल्ल थाहा भो ।